Russiýa tarapyndan anneksiýa edilen Krymy Ukrainanyň günorta sebiti bilen, Hersonyň basylyp alnan bölegi bilen birleşdirýän esasy köprä, Moskwa tarapyndan bellenen resminiň tassyklamagyna görä, ukrain güýçleriniň atan "Storm Shadow" raketalary zyýan ýetirdi.
Krymyň Moskwa tarapyndan bellenen başlygy Wolodymyr Saldo öz telegram kanalynda 22-nji iýunda, irden Çongar sebitindäki köprä, Krymyň derwezesi diýlip atlandyrylýan ýere zarba urlandygyny aýtdy. Bu Krymy Ukrainanyň galan bölekleri bilen baglaýan birnäçe möhüm ugruň biri bolup durýar.
Bu hüjüm rus güýçleriniň öten agşam ýurduň raýat infrastrukturalaryna täze raketa we pilotsyz uçar zarbalaryny uran wagtyna gabat geldi.
Saldo köpriniň üstündäki ýola zyýan ýetendigini, ýöne alternatiw transport ýollarynyň açylandygyny aýtdy. Saldodan aýratynlykda, Krymyň Moskwa tarapyndan bellenen ýene bir başlygy Sergeý Aksýonow ýöriteleşdirilen gulluklaryň köprülere ýetirilen zyýany gözden geçirýändiklerini aýtdy.
Ukrain goşunynyň telegram kanalynda zyýan ýeten köpriniň suratlary çap edildi, Ukrainanyň baş aňtaw gullugynyň metbugat sekretary Andri Ýusow bolsa, köprä edilen hüjümi nazarda tutup, ukrain telewideniýesine [Russiýanyň Krymdan kowlup çykarylmagy ugrundaky] iş dowam edýär we dowam etdiriler" diýdi.
Britaniýa geçen aý Ukraina “Storm Shadow” raketalaryny bagyş edýändigini yglan etdi.
Geçen ýylyň oktýabr aýynda, Krymy Russiýanyň esasy bölegine Kerç bogazynyň üstünden birleşdirýän uly köprüde bolan partlamadan soň turan ýangyn gatnawyň düýpli azalmagyna getirdi we Russiýa bu partlama Ukrainanyň eden hüjüminiň sebäp bolandygyny aýtdy.
Russiýa Ukrainanyň Krym ýarymadasyny 2014-nji ýylda, bikanun anneksiýa etdi. Ukraina 2022-nji ýylyň fewral aýynda duldegşir goňşusyna garşy giň gerimli urşa başlan Russiýadan Krymy yzyna almagy wada berdi.
Şu aralykda, rus güýçleri öten agşam ýurduň raýat nyşanalaryna täze raketa we pilotsyz uçar zarbalaryny urdy diýip, ukrain goşuny 22-nji iýunda, irden beren hasabatynda aýtdy.
Şeýle-de, harbylar Russiýanyň gündogar Donetsk sebitindäki hüjümlerini güýçlendirýandigini, bu ýerde gazaply söweşleriň barýandygyny aýtdylar.
Baş ştab Ukrainanyň howa goragçylarynyň Eýranda öndürilen alty sany pilotsyz uçaryň ählisini urup gaçyrandygyny habar berdi, ýöne hiç bir jikme-jikligini aýtman, parahat ilatyň arasynda öldürilen adamlaryň hem bolandygyny belledi.
Mundan başga, Russiýa Ukrainanyň raýat desgalaryny nyşana alyp, 44 sany raketa atdy we dürli ýaraglardan 47 tapgyr top atdy diýip, harbylar aýtdy.
Odesanyň sebit harby dolandyryşy astyndaky ýerli halk geňeşiniň başlygy Serhiý Bratçuk Ukrainanyň günortasynda üç sany pilotsyz uçaryň urlup gaçyrylandygyny, emma beýleki pilotsyz uçarlaryň Odesa sebitine azda bolsa zyýan ýetirendigini habar berdi.
Donetsk sebitiniň başlygy Pawlo Kyrylenko rus toplarynyň Horliwkanyň golaýyndaky Çasiw Ýarda bir parahat ýaşaýjyny öldürendigini, alty adamyň bolsa ýaralanandygyny aýtdy.
Krywiý Rih, Dnipropetrowsk, Herson we Harkow sebitleriniň ýolbaşçylary hem öten agşam amala aşyrylan topa tutmalar barada habar berdiler. Sebit häkimi Oleh Synehubow Harkowda bir adamyň ýaralanandygyny aýtdy.
Russiýa geçen aýyň başyndan bäri Ukraina urýan zarbalaryny güýçlendirip, köp sanly raýat pidasyna sebäp boldy, ýurduň infrastrukturasyna zyýan ýetirdi.
Söweş meýdanynda, baş ştabyň maglumatyna görä, Donetskde "agyr söweşler" barýar, ukrain goragçylary Liman, Bahmut, Awdiýiwka we Marýinka ugurlarynda ruslaryň 40 hüjümini yzyna serpikdirdi.
Ukrain güýçleri Zaporižýanyň we Hersonyň günorta sebitlerinde edýän hüjümlerini dowam etdirdiler diýip, harbylar 22-nji iýunda aýtdylar. Ýöne olar Ukrainanyň garşylykly hüjümi barada jikme-jik maglumat bermediler.
Baş ştabyň metbugat sekretary 21-nji iýunda ukrain güýçleriniň Zaporižýanyň Melitopol we Berdýansk şäherlerinde öňegidişlik edendigini aýtdy.
Ukrainanyň prezidenti Wolodymyr Zelenski BBC bilen söhbetdeşlikde garşylyklaýyn hüjümiň gidişiniň “islenilişinden has haýaldygyny”, ýöne Kiýewiň onuň tizleşdirilmegi üçin basyş etmejekdigini aýtdy.
"Adamlaryň käbiri muňa Holliwud filmidir öýdýär we derhal netije gazanylmagyna garaşýar. Ýöne bu beýle däl, bu ýerde adam ömri töwekgellige goýulýar” diýip, Zelenski sözüniň üstüni ýetirdi.
Forum