Ukrainalylar ýedinji aýyna girýän urşuň we weýrançylygyň arasynda, Sowet Soýuzyndan garaşsyz ýurt bolmagyň 31 ýyllygyny bellediler, şu aralykda Dnipropetrowsk sebitindäki Çaplin demirýol menziline urlan zarbada, rus goşunlarynyň giň meýdana ýaýraýan demir gyçakly oklary ulanmagy netijesinde, 25 adam öldi, 31 adam ýaraly boldy.
Bu uruş ýurtda on müňlerçe adamyň ölmegine, ukrain ykdysadyýetiniň weýran edilmegine we Russiýanyň hakykatda halanylmaýan döwlete öwülmegine alyp geldi.
Prezident Wolodymyr Zelenski Russiýany Dnipropetrowsk sebitindäki Çaplin demirýol menziline, parahat adamlara gönükdirilen raketa zarbasyny urmakda günäkärledi.
"Çaplin bu gün biziň agyr hasratymyz. Şu wagta çenli ol ýerde 22 adam öldi, olaryň bäşisi demirýol wagonynda ýandy" diýip, prezident biraz öň, gije eden wideo ýüzlenmesinde aýtdy.
"Demirýol menzilinde gözleg we halas ediş işleri dowam etdiriler. Biz basybalyjylaryň ähli eden ähli işleri üçin jogap bermegini hökman gazanarys. Biz basybalyjylary öz topragymyzdan hökman kowup çykararys" diýip, ol sözüniň üstüni ýetirdi.
Russiýanyň Goranmak ministrligi 25-nji awgustda Çapliniň demirýol menziline urlan zarbany boýun aldy, ýöne öň hatara ok-däri getirýän ukrain otlusynyň nyşana alnandygyny öňe sürdi.
Biraz öň, 24-nji fewralda başlanan uruşdan bäri agyr ýitgileriň çekilendigini boýun alan Zelenski öz "täzeden doglan" ýurdunyň rus goşunlaryna garşy "soňuna çenli" söweşjekdigini aýtdy.
Ukrainanyň ýaragly güýçleriniň baş serkerdesi şu hepde, başlanaly bäri alty aý geçen urşuň dowamynda 9000 töweregi ukrain harbysynyň öldürilendigini aýtdy.
Kiýew we beýleki birnäçe uly şäher, Russiýanyň Garaşsyzlyk gününden peýdalanyp, raýat we hökümet infrastrukturasyna zarba urmak ähtimallygy baradaky duýduryşlaryň arasynda, köpçülikleýin dabaralary gadagan etdi.
Ukrain paýtagtynda häkimiýetler, Moskwanyň paýtagty basyp almak üçin eden şowsuz synanyşygyny ýatlatmak üçin, Kiýewiň meşhur Hreşçatyk köçesinde weýran edilen rus harby ulaglaryny we tanklaryny görkezdiler.
Bu uruş bir tarapdan görlüp-eşidilmedik, rus ykdysadyýetine uly zarba bolan Günbatar sanksiýalaryna, Moskwanyň halkara derejesinde izolýasiýa edilmegine sebäp bolsa, ikinji tarapdan, ukrain goranyşyny güýçlendiren Günbatar kömegine, goldawyna we ýaraglaryna sebäp boldy.
24-nji fewraldan bäri takmynan 12 milliard dollar möçberinde kömek beren Birleşen Ştatlar Ukraiananyň Garaşsyzlyk gününe gabat ýene 3 milliard dollarlyk harby kömek berjekdigini yglan etdi.
"Amerikalylaryň ählisiniň adyndan Ukrainanyň halkyny garaşsyzlyk güni bilen gutlaýaryn" diýip, prezident Jo Baýden 24-nji awgustda täze beriljek kömegi yglan edende aýtdy.
Britan premýer-ministri, Garaşsyzlyk baýramyny bellemek üçin Kiýewe öňünden aýdylmadyk sapara gelen Boris Jonson bolsa, Angliýanyň Ukraina berýän goldawyny mundan aňryk hem dowam etdirjekdigini aýtdy. London hem, Waşington ýaly, Ukraina ýarag we kömek beren esasy paýtagtlaryň biri boldy.
“Ukrainada bolup geçýän zatlar biziň hemmämiz üçin wajyp. Şonuň üçin men şu gün Kiýewde boldym” diýip, ol twitterde ýazdy. "Men Ukrainanyň bu söweşde ýeňip biljekdigine we ýeňjekdigine ynanýaryn" diýip, Jonson sözüniň üstüni ýetirdi.
NATO-nyň baş sekretary Jens Stoltenberg bolsa, "öz ýurtlary ugrundaky söweşlerde wepat bolan ýa-da ýaralanan ukrainalylara, öz ýurdunyň azatlygy, öz ýakynlary üçin söweşýän ähli ukrain erkeklerine we aýallaryna” hormat-sylagyny bildirip, ukrainalylaryň NATO goldawyna näçe wagt gerek bolsa, şonça-da uzak wagt bil baglap biljekdigini aýtdy.
Russiýa bu ýurda çozanda Ukrainanyň NATO-a goşulmak baradaky islegini bahana edindi.
2014-nji ýylda, Russiýa tarapdar prezidentiň wezipesinden çetleşdirilmegine alyp gelen köçe protestlerinden soň, Moskwa Ukrainanyň Krym ýarym adasyny anneksiýa etdi we gündogar Donetsk we Luhansk sebitlerini ele geçiren rus dilli separatistleri goldady.
Russiýa 24-nji fewraldan bäri Ukrainanyň günorta we gündogar sebitlerine edýän gözegçiligini güýçlendirdi, emma muňa garamazdan, Günbataryň harby resmileriniň ýakynda gelen netijelerine görä, bu konflikt şu günki günde petige gelip diredi.
Zelenski öz çykyşynda ukrainalylaryň "soňuna çenli" söweşjekdigini we diňe tutuş ýurt gaýtadan bir-bitewi göwre bolanyndan soň saklanjakdygyny aýtdy.
Rim papasy Fransis 24-nji awgustdaky hepdelik ýüzlenmesinde bu "däliligiň" soňlanmagy üçin "anyk ädimleriň" ädilmegine we Zaporižýa ýadro elektrik stansiýasyndaky "ýadro betbagtçylygy" howpunyň öňüni almak üçin çäre gömülmegine çagyrdy.
Ukrain harbylarynyň aýtmagyna görä, 24-nji awgustdaky baýramçylyk keýpini bozup, Russiýa ýurduň dürli ýerlerindäki raýat nyşanalaryna zarba urmagyny dowam etdirdi.
Rus güýçleri Donetsk sebitindäki Bahmutyň we Kodemanyň golaýyndaky ukrain pozisiýalaryna, şeýle-de Piski we Newelske şäherçeleri tarapyna hüjüm etdi diýip, beýanatda aýdylýar.
Sewastopol sebitiniň Moskwa tarapyndan bellenen häkimi Mihail Razwojaýewiň sözlerine görä, Russiýanyň howa goraglary 23-nji awgustda Krymyň Sewastopol şäheriniň golaýynda Ukrainanyň pilotsyz uçarlaryny urup ýykdy. Ýöne ol ýykylan uçarlaryň sanyny aýtmady.
Bu aýdylýanlaryň hiç biri garaşsyz ýagdaýda tassyklanyp bilinmedi.
Şu aralykda adam hukuklaryny goraýan “Human Rights Watch” guramasynyň täze hasabaty çap edildi. Onda rus goşunynyň Ukrainadaky uruşda giňden ulanýan top oklarynyň giň meýdana ýaýraýan ownuk gyçaklarynyň ýüzlerçe parahat adama zyýan ýetirip, uzak wagtlyk ejir çekdirýändigi aýdylýar.
Forum