Prezident Wolodymyr Zelenski Moskwanyň Kiýewiň 31 ýyllyk garaşsyzlyk baýramynyň öňüsyrasynda has düýpli hüjümlere taýýarlanýan bolmagynyň ahmaldygy baradaky duýduryşyny gaýtalaýan wagtynda, rus güýçleri Ukrainanyň gündogaryndaky we günortasyndaky nyşanalara zarba urmaklaryny dowam etdirdi.
Ukrainanyň baş ştaby 22-nji awgustdaky gündelik maglumatynda rus güýçleriniň artilleriýa we tapgyrlaýyn ot açyş ulgamlarynyň gündogar Bahmut sebitindäki Soledar, Zaýtsewe we Bilohoriwka şäherçelerine zyýan ýetirendigini aýtdy.
Rus güýçleri öz ähli tagallalaryny gündogar Luhansk we Donetsk sebitlerine doly gözegçilik etmäge, Herson şäheriniň basylyp alnan ýerlerini we Harkow, Zaporižýa we Mikolaýw sebitleriniň böleklerini elde saklamaga gönükdirdiler diýip, baş ştabyň habarynda aýdylýar.
Zaporižýa ýadro desgasynyň garşysynda, Dnieper derýasynyň beýle ýüzünde ýerleşýän Nikopol şäheri öten agşam bäş gezek, tapgyrlaýyn topa tutuldy diýip, sebit häkimi Walentin Rezniçenko 21-nji awgustda Telegramda ýazdy.
Ol şähere 25 sany artilleriýa zarbasynyň urlandygyny, olaryň senagat binalarynda ýangyn turmagyna, 3000 ýaşaýjynyň elektrik togunyň kesilmegine sebäp bolandygyny aýtdy.
Zaporižýanyň golaýynda bolan söweşler we Woznesenskä, Ukrainanyň ikinji uly ýadro desgasyndan uzak bolmadyk günorta şähere urlan raketa zarbasy ýadro hadysasy baradaky gorky-howatyrlary döretdi.
ABŞ-nyň prezidenti Jo Baýden, Angliýanyň premýer-ministri Boris Jonson, Germaniýanyň kansleri Olaf Şolz we Fransiýanyň prezidenti Emmanuel Makron dagy 21-nji awgustda telefon arkaly söhbetdeşlik geçirip, ýadro desgalarynyň howpsuzlygyny üpjün etmegiň örän möhümdigini nygtadylar we, şol bir wagtyň özünde, özleriniň Ukraina bolan "berk ygrarlylyklaryny" gaýtaladylar.
Zelenski Moskwanyň 24-nji awgustdan, Ukrainanyň garaşsyzlyk gününi belleýän senesinden we Russiýanyň Ukraina garşy başlan esassyz çozuşyna ýarym ýyl bolmazyndan öň "nähilidir bir aýratyn elhençligi" synag edip biljekdigini aýdyp, hüşgärlige çagyrdy.
Zelenski mümkin bolan "ähli howpy" Makron bilen ara alyp maslahatlaşandygyny we bu gürrüňi beýleki ýolbaşçylara, şol sanda Türkiýäniň prezidenti Taýyp Erdogana, BMG-niň Baş sekretary Antonio Guterrişe hem ýetirendigini aýtdy.
"Terror döwletiniň şu hepde nämä taýynlanyp biljekdigi baradaky habar Ukrainanyň hyzmatdaşlarynyň ählisine iberildi" diýip, Zelenski gijeki wideo ýüzlenmesinde Russiýany nazarda tutup aýtdy.
Şeýle-de Zelenski, eger Russiýa Mariupolda ýesir alnan ukrain goragçylaryny jogapkärçilige çekmek meýilnamasyny durmuşa geçirip başlasa, onda onuň halkara düzgünlerini bozup, özüni gepleşiklerden daşlaşdyrjakdygyny, kesjekdigini duýdurdy.
"Eger-de bu hili ýigrenji, tomaşa kazyýet işi dowam etdirilse ... bu gepleşikleriň mundan aňryk mümkin bolmajak çäginden geçildigi bolar” diýip, ol aýtdy. "Ol ýerde başga gepleşik bolmaz. Biziň döwletimiz hemme zady aýtdy" diýip, ol sözüniň üstüni ýetirdi.
“The Financial Times” gazetiniň 21-nji awgustdaky sanynda çap edilen makalada Moskwanyň BMG-däki, Ženewadaky ilçisi Gennadiý Gatilowyň sözlerine salgylanyp aýdylmagyna görä, Erdogan iki ýurduň arasyndaky dialoga ýardam bermäge synanyşdy.
Ýöne ol "beýle duşuşygy geçirmek üçin hiç bir amaly platformanyň ýokdugyny" aýdyp, Zelenski bilen Russiýanyň prezidenti Wladimir Putiniň arasyndaky gepleşikler barada edilýän gep-gürrüňleri ret etdi.
Russiýa özüniň “Kalibr” raketalarynyň Ukrainanyň günorta-gündogaryndaky Odesa sebitinde ABŞ-da öndürilen HIMARS raketalarynyň raketalaryny hem öz içine alýan ok-ýarag ammaryny ýok edendigini aýtdy, emma Kiýew bir däne ammarynyň urlandygyny aýtdy.
Bu aýdylýanlaryň hiç biri garaşsyz şertlerde tassyklanyp bilinmedi.
Forum