Prezident Wolodymyr Zelenskigelip gowşan döwrebap Günbatar ýargalarynyň köpelmegi bilen, Ukrainanyň indi rus basybalyjylaryna "düýpli zyýan" ýetirip biljekdigini, söweş meýdanyndaky deňagramlylygyň ýuwaş-ýuwaşdan üýtgedýändigini aýtdy. Resmiler port şäheri Odesa urlan raketa zarbalarynyň parahat ilatdan ençeme adamyň ýaralanmagyna sebäp bolandygyny habar berdiler.
Şu aralykda rus goşunlarynyň atan raketalary gündogar Donbas sebitinde Ukrainanyň gözegçiliginde galan iň soňky şäherleriň biriniň, Kramatorsk şäheriniň merkezine düşdi.
Kramatorsk şäher häkimi Oleksandr Honçarenko 19-njy iýulda Telegramdaçap eden habarynda "pidalaryň bardygyny" aýtdy, ýöne goşmaça maglumat bermedi.
Zelenski 18-nji iýul gijesi eden wideo çykyşynda Ukrainadaky 1028 oba-şäherçäniň rus güýçlerinden azat edilendigini, ýöne 2621 oba-şäheriň Russiýanyň gözegçiliginde galýandygyny habar berdi.
Zelenski ukrain güýçleriniň “basybalyjylara düýpli maddy-tehniki zyýan çekdirip bilendigini” we munuň rus goşunynyň basyp alan ýerlerinde pozisiýa eýelemegini gitdigiçe kynlaşdyrandygyny aýtdy.
“Biz ädimme-ädim öňe gidýäris, basybalyjylaryň üpjünçiligini kesýäris, olar bilen hyzmatdaşlyk edýänleri kesgitleýäris we zyýansyzlandyrýarys. Gelejek äşgär: Ukrain baýdagy biziň ähli şäherimizde we obalarymyzda bolar. Bu ýerde ýeke-täk mesele wagt” diýip, Zelenski aýtdy.
HIMARS ulgamy ýaly uzak aralyga atýan amerikan ýaraglarynyň "öz wagtynda gelip ýetişmegi" söweş meýdanyndaky ýagdaýy üýtgetmäge kömek edýär diýip, ukrain goşunynyň baş serkerdesi Waleriý Zalužni aýtdy.
"Biz ýagdaýy durnuklylaşdyrmagyň hötdesinden geldik. Ýagdaý çylşyrymly, dartgynly, ýöne doly gözegçilik astynda" diýip, Zalužni aýtdy.
“Goranyş hatarlaryny we sepgitlerimizi saklap bilmegimize kömek edýän möhüm faktor M142 HIMARS ýaraglarynyň öz wagtynda gelip ýetişmegi bolup, biz indi duşmanyň gözegçilik postlaryna, ok-däri we ýangyç ammarlaryna gönümel zarba urup bilýäris” diýip, CNN Zalužniniň sözlerine salgylanyp aýtdy.
"Şu günki gün biz hakykatdan hem bir aý öňki ýagdaýymyzdan düýpgöter üýtgeşik ýagdaýy başdan geçirýäris. Indi, hyzmatdaşlarymyzdan alýan ýaraglarymyzyň ýeterlik bolmagy sebäpli, biz belli bir sepgitlerde belli bir deňeçerligi ýola goýduk” diýip, Ukrainanyň Milli howpsuzlyk we goranmak geňeşiniň başlygy Oleksi Danilow telewideniýede berlen çykyşynda aýtdy.
"Günbatar ýaraglary 100 göterim däl-de, 200 göterim işleýär, şu sebäli hem [rus] ammarlary partladyldy. Serkerdelik postlary hem partladyldy" diýip, Luhansk sebit harby administrasiýasynyň başlygy Serhiý Haýdaý 19-njy iýulda aýtdy.
Rus goşunlarynyň Ukrainanyň günortasyndaky port şäheri Odesa atan raketalary azyndan alty adamy, şol sanda bir çagany ýaralady diýip, Odesanyň harby administrasiýasynyň metbugat wekili Serhiý Bratçuk 19-njy iýulda Telegramda habar berdi.
Bratçuk Odesa Gara deňizden atylan ýedi sany ganatly "Kalibr" raketasynyň altysynyň Ukrainanyň howa goragçylary tarapyndan urlandygyny, olaryň "parahat adamlaryň" ýaşaýan sebitlerine gönükdirilendigini aýtdy.
Şäheriň gyssagly kömek gullugynyň maglumatyna görä, 18-nji iýulda Ukrainanyň gündogaryndaky Toretsk şäherine urlan zarbada alty adam öldi. 30 müň çemesi ilaty bolan Toretsk ýurduň gündogarynda Ukrainanyň gözegçiliginde galýan iň soňky senagat şäherleriniň biri bolan Kramatorskdan 50 km töweregi günortada ýerleşýär.
Ukrainanyň we ABŞ-nyň goranmak resmileri 18-nji iýulda, Ukrainanyň Goranyş boýunça aragatnaşyk toparynyň şu hepdäniň ahyrynda geçiriljek duşuşygynyň öňüsyrasynda ýerlerdäki ýagdaýlary ara alyp maslahatlaşdylar.
Ukrainanyň Goranmak ministri Oleksi Reznikow twitterde ABŞ-nyň Goranmak ministri Lloýd Ostin bilen ýakyn wagtda boljak duşuşygyň çäk-çygyrlaryny ara alyp maslahatlaşmak üçin telefonda gürleşendigini aýtdy.
"Biz duşuşygyň gün tertibinde garaljak meseleleri ylalaşdyk, Ukraina gelýän ýaraglara gözegçilik we ş.m. barada maglumat alyşdyk. Şeýle-de, @Goranmak Sekretary (Austinde) gaty gowy habarlar bar, ýöne jikme-jiklikler biraz soň geler" diýip, Reznikow aýtdy.
Ukrainanyň Goranyş boýunça aragatnaşyk toparynyň indiki duşuşygy 20-nji iýulda geçiriler. Toparyň maý aýynda geçirilen soňky ýygnagyna jemi 47 ýurt gatnaşdy we olaryň 20-si Ukraina üçin howpsuzlyk bukjalaryny yglan etdi.
Angliýanyň Goranmak ministrligi 19-njy iýulda çap eden aňtaw maglumatlarynda Russiýanyň iň ýakynda yzarlaýan maksadynyň gündogar Donetsk sebitini doly ele geçirmekden ybaratdygyny aýtdy.
Ukrain goşunynyň aýtmagyna görä, Moskwa Donetsk we Luhansk sebitlerini doly basyp almak maksady bilen, öz hüjümiň indiki tapgyryna taýýarlanýar.