Rus güýçleri ýurduň ikinji uly şäheri Harkowy topa tutmak bilen, gündogar Ukraina edýän hüjümlerini güýçlendirýärler. Ukrainanyň demirgazyk-gündogarynda, ýöne Donbasyň daşynda ýerleşýän Harkowyň sebit gubernatory Oleh Sineýhubow 1,45 million ilatly şäherde bir ýaşaýyş jaýynyň we mekdebiň raketa bilen urlandygyny, üç adamyň ölendigini we 28 adamyň ýaralanandygyny aýtdy.
"Hüjümleriň ählisi gönüden-göni raýat desgalaryna gönükdirildi. Bu doly terrorçylyk!" divip, Sineýhubow aýtdy.
Russiýa bu hüjümleri Ukraina harbylaryna we daşary ýurtly hakyna tutulan söweşijilere garşy gönükdirilendigini, Ukrainanyň goşunlarynyň söweşde agyr ýitgi çekýändigini öňe sürdi.
Şu aralykda Ukrainanyň halas ediş toparlary gündogar Donetsk sebitinde rus raketa hüjümine sezewar bolan binanyň harabalyklaryndaky gözleg, agtaryş işlerini dowam etdirip, bäş gatly ýaşaýyş jaýyna urlan raketa zarbasy netijesinde azyndan 18 adamyň ölendigini aýtdylar.
"11-nji iýulda, irden sagat 8:45-e cenli… 18 adamyň jesedi tapyldy, alty adam harabalykdan halas edildi we 137 tonna çemesi haraba aýryldy” diýip, Çaziw Ýar şäheriniň ýerli adatdan daşary kömek edarasy aýtdy.
Soňky hepdelerde dowam eden gazaply söweşlerden soň goňşy Luhansk sebitiniň aglaba bölegini ele geçiren rus güýçleri Donetsk sebitine edýän hüjümlerini hem güýçlendirdiler, resmiler Çaziw Ýar şäherindäki ýaşaýyş jaýynyň harabalarynda şindi hem onlarça adamyň çykyp bilmän galan bolmagyndan howatyr edýärler.
Donetsk sebitiniň häkimi Pawlo Krilenkonyň Telegramda ýazmagyna görä, Russiýanyň “Uragan” raketasy bilen urlan ýaşaýyş jaýynyň harabalarynyň aşagynda azyndan ýene 30 adamyň galan bolmagy mümkin.
Ukrainanyň prezidenti Wolodymyr Zelenski Çasiw Ýara edilen hüjümiň uruş jenaýatlary meselesini ýakyn hepdelerdäki meýilnamasyna girizmegine sebäp bolandygyny aýtdy.
"Ukrainanyň hukuk goraýjy edaralary basyp alyjylaryň eden jenaýatlaryny hasaba almak we subutnamalary toplamak üçin uruş başlaly bäri zerur bolan zatlaryň ählisini edýär" diýip, ol 10-njy iýuldaky wideo ýüzlenmesinde aýtdy.
Onuň sözlerine görä, meýilleşdirýän gepleşikler "rus uruş jenaýatçylarynyň jezalandyrylmagyna ýardam eder”.
Kirilenko bu hüjümiň 9-njy iýul güni, giçlik bolandygyny aýtdy. Kramatorskdan 20 km günorta-gündogarda ýerleşýän we takmynan 12,000 ilaty bolan Çaziw Ýar şäheri ýakynda rus güýçleriniň ýene bir nyşanasyyna öwrüldi.
Ukrain prezidentiniň diwanynyň başlygy Andriý Ýermak bu zarbanyň "ýene bir terrorçylykly hüjümi" bolandygyny we munuň netijesinde Russiýanyň "terrorçylyga howandarlyk edýän döwlet" hökmünde kesgitlenmelidigini aýtdy.
Çaziw Ýara garşy urlan raketa zarbasy Russiýanyň Ukrainadaky raýat gurluşlaryna eden köp sanly hüjümleriniň biri boldy.
Ukrainany ýaragsyzlandyrmak üçin "ýörite harby operasiýa" geçirýändigini aýdýan Russiýa uruşda parahat ilaty nyşana alýandygyny ret edýär.
Russiýanyň Goranmak ministrliginiň metbugat sekretary Igor Konanşenkow "Çaziw Ýar" hüjüminde ukrain harby brigadasynyň ýygnanýan ýerine zarba urlandygyny we takyk ýaraglaryň ulanylandygyny aýtdy.
Urşuň iki tarapyndaky köp hadysalarda bolşy ýaly, bu aýdylýanlar derrew, garaşsyz ýagdaýda tassyklanyp bilinmedi.
Russiýa tarapyndan goldanýan separatist güýçler 11-nji iýulda Bohorodiçne obasyny ele geçirendiklerini aýtdylar. Olar bu obany 24 km uzaklykda ýerleşýän Slowýanskä, Donetskiniň esasy şäherine hüjüm etmek üçin "gowy köpri" hasaplaýarlar.
Ukrain resmileri rus güýçleriniň 10-njy iýulda Slowýanskyň golaýyndaky sebitlere hüjüm edendigini, emma yza çekilmäge mejbur bolandygyny aýtdy.
Gündogar Luhansk sebitiniň häkimi Serhiý Haýdaý rus goşunlarynyň Slowýanskdan 50 km gündogarda ýerleşýän Bilohoriwka obasynda hem toplanýandygyny aýtdy.
24-nji fewralda başlanan urşuň ilkinji günlerinde paýtagt Kiýewi eýelemek niýetleri puç bolan rus güýçleriniň baş nyşanasyna öwrülen Donetsk we Luhansk sebitleri Ukrainanyň Donbas sebitiniň esasyny düzýär.
Şeýle-de, bu sebitleri 2014-nji ýylda bikanun ele geçirilen we anneksiýa edilen Krym ýarym adasy bilen baglanyşdyryp, rus goşunlary Ukrainanyň günortasynda hem kän ýeri basyp aldy.
Ukrain goşunynyň baş ştaby 11-nji iýul güni irden rus goşunynyň ýurduň gündogaryndaky oba-şäherleri topa tutmagyny hem dowam etdirýändigini aýtdy.
"Basybalyjylaryň Mariýinka ugrundaky hüjümleri doly puja çykaryldy, olary biziň esgerlerimiziň oklary astynda yzlaryna gaçdylar" diýip, ukrain goşuny aýtdy. Emma bu aýdylýanlary garaşsyz ýagdaýda tassyklatmak başartmady.
TASS habar gullugy Russiýanyň howa gorag ulgamlarynyň 10-njy iýulda Hersonda has işjeňleşendigini we şäheriň merkezinde dört sany partlama sesiniň eşidilendigini, asmana galan tüsse dumanynyň göze ilendigini habar berdi.
Şu aralykda Ukrainanyň Goranmak ministri Oleksi Reznikowyň aýtmagyna görä, ABŞ-nyň uzak aralyga niýetlenen tapgyrlaýyn raketa ulgamlary eýýäm söweş meýdanynda “uly üýtgeşiklik” döretdi.
Howpsuzlyk Geňeşiniň sekretary Oleksi Danilowyň aýtmagyna görä, Ukrainada häzir ABŞ we beýleki ýaranlar tarapyndan berlen ýokary çeýelikli artilleriýa ulgamlarynyň, “HIMARS” diýilýänleriň we şuňa çalymdaş beýleki raketa atyjylaryň dokuz sanysy bar.
Birleşen Ştatlar 8-nji iýulda bu ulgamlaryň ýene dört sanysyny iberjekdigini yglan etdi. Bu ABŞ tarapyndan iberilen HIMARS-laryň sanyny 12-ä ýetirer.
Şu aralykda, Reznikow Britaniýanyň “Taýms” gazetine beren interwýusynda ýurduň günortasyndaky ýerleri yzyna almaga görülýän taýýarlygyň çäginde, hüjüme geçmek üçin, Kiýewiň täze berlen günbatar ýaraglary bilen enjamlaşdyrylan 1 million esgeri toplaýandygyny aýtdy.