Ukrain harbylary ýurduň demirgazyk-gündogarynda, Harkowyň töwereginde barýan söweşleriň gyzandygyny, Russiýanyň tarapynda söweşýän hususy hakyna tutma güýçleriň aýratyn agyr ýitgi çekendigini aýdýarlar. Orsýete tarapdar telegram kanallarda Harkow sebitiniň Balakliýa şäherinde rus goşunlarynyň daşynyň gabalandygy, Ukrainanyň şäher eteginde ýerleşýän uly harby ammarlarynyň azat edilendigi habar berilýär.
Ýaragly güýçleriň baş ştaby 7-nji sentýabrda söweş meýdanyndaky ýagdaýa baha berip, hakyna tutulan hususy esgerleriň "uly ýitgi" çekendigini, olaryň 40%-den gowragynyň ýa agyr ýaralanandygyny, ýa-da öldürilendigini” aýtdy.
Ukrain çeşmeleri jikme-jik maglumat bermedi, ýöne Luhansk sebitiniň Kiýewe tarapdar gubernatory ukrain esgerleriniň garşylykly hüjüminiň dowam edýändigini we "käbir üstünlikleriň hözirini görýändigini" aýtdy.
Russiýanyň başlan alty aýlyk urşunyň dowamynda iki tarapyň hem söweş meýdanyndan berýän maglumatlaryny bada-bat tassyklamak ýa inkär etmek mümkin däl.
Emma ukrain goşuny rus tarapynyň gündogar Donetsk sebitini doly gözegçilige almak, Harkowy we basylyp alnan günorta sebitlerini elde saklamak, şol sanda Zaporižýa ýadro desgasynyň we Mikolaýewiň töweregindäki ýerleri basyp almak tagallalaryny dowam etdirýändigini aýtdy.
Şeýle-de, rus goşunlarynyň Ukrainanyň geçen hepde başlandygy aýdylýan uly hüjümine garşy durup, Hersonda eýelän ýerlerini saklamak üçin söweşýändigi aýdylýar.
Moskwany goldaýan ýokary derejeli separatist ukrain güýçleriniň Russiýanyň gözegçiligindäki gündogar şähere, Harkow bilen Izýum şäherleriniň arasynda ýerleşýän Balakliýa hüjüm edendigini aýtdy.
Ukrain goşuny 6-njy sentýabr güni irden Izýumyň eteginde, Balakliýa sebitindäki rus goşunlaryna zarba urdy diýip, harby žurnalisti Ýuriý Kotenok habar berdi. Onuň ýazmagyna görä, 7-nji sentýabr güni irden bu şäherde Rosgwardiýasynyň ýörite güýçleriniň esgerleri gabawa salyndy. Žurnalist gabalan esgerler bilen aragatnaşygyň kesilendigini aýtdy.
Degişli maglumat Ukrain premýeri Germaniýada Şolz bilen duşuşyp, söweş tanklaryny soradyMart aýynda rus goşunlarynyň eline geçen Balakliýanyň eteginde Ukrainanyň Ýaragly güýçleriniň Merkezi raketa we artilleriýa müdirliginiň iň uly ok-ýarag ammary ýerleşýär.
Russiýa tarapdar kanallar ukrain goşunlarynyň Balakliýa şäheriniň etegindäki Werbowka obasyny azat edendiklerini, bu ýerde Russiýanyň uly arsenalynyň ýerleşendigini habar berýärler. Bu maglumatlary Amerikanyň Uruşlary öwrenýän instituty hem tassyklaýar diýip, Azatlygyň Rus gullugy habar berýär.
Baş ştab 7-nji sentýabrda rus ok-däri ammarlaryna we duşmanyň ýa-da duşman enjamlarynyň jemlenen beýleki ýerlerine onlarça howa zarbasynyň urlandygyny, bu işiň dowam etdirilýändigini aýtdy.
Luhansk sebitiniň gubernatory Serhiý Gaýdaý ukrain telewideniýesine "garşylyklaýyn hüjümiň dowam edýändigini" aýtdy we "[Biziň] güýçlerimiz belli bir derejede üstünlik gazanýar. Geliň, şunda goýalyň" diýdi.
Kiýew bu hüjümiň nähili barýandygyny aýtmaýar.
Ukrain goşuny rus tarapyny Zaporižýa ýadro desgasynyň töweregini topa tutmakda aýyplady.
Halkara atom energiýasy agantligi (HAEA) Zaporižýadaky howpsuzlyk ýagdaýy barada hasabat çap etdi we ýadro heläkçiliginiň öňüni almak üçin, sowet döwründe gurlan desgada "gyssagly çäre görülmegine” çagyrdy.
Zaporižýa urşuň başynda basylyp alyndy we taraplaryň bu desganyň töweregine atylýan top oklarynda bir-birini aýyplamagy zawody işledýän ukrain işgärleriniň onuň alty reaktorynyň ählisiniň işini togtatmagyna alyp geldi.
"Biz ot bilen oýnaýarys we örän we örän betbagtçylykly bir zat bolup biler" diýip, HAEA-niň başlygy Rafael Grossi 6-njy sentýabrda, hasabat çap edilenden birnäçe sagat soň BMG-niň Howpsuzlyk geňeşine aýtdy.
Rus resmileri bu çagyryşy derhal ret etdiler we özleriniň gürrüňi edilýän desgany goraýandyklaryny aýtdylar.
Russiýanyň ilçisi Wasiliý Nebenzýa HAEA-nyň edýän teklibi "çynlakaý däl", sebäbi ukrainalylar "derrew öňe sokulyp, ähli zady bulam-bujar ederler" diýdi.
BMG-niň Baş sekretary Antonio Guterriş 15 agzaly Howpsuzlyk geňeşi bilen söhbetdeşlikde Ukrainany we Russiýany ýadro desgasyna gönükdirilen harby hereketlerden gaça durmaga çagyrdy we Russiýanyň "ähli harby işgärleri we enjamlary şol çäkden çykarmaga, ukrain güýçleriniň bolsa bu ýere girmezlige ygrarly bolmalydygyny” aýtdy.