Ukrain harbylary rus güýçleriniň gündogarda uly hüjüme taýýarlanýandygyny görkezýän görnetin alamatlaryň bardygyny aýdýarlar. Moskwa güýçleriniň günde-günaşa üznüksiz topa tutmagyna garamazdan, bu ýerde aýlap dowam edýän söweşlerde ilerleme gazanylmady.
1-nji fewral güni giçlik atylan toplar Kramatorskda azyndan üç adamyň ölmegine we 20 adamyň ýaralanmagyna sebäp boldy. Donetsk sebitiniň harby administrasiýasynyň başlygy Pawlo Kyrylenko rus raketasynyň Kramatorskdaky ýaşaýyş jaýyna gelip urandygyny aýtdy.
"Duşman işjeň aňtaw işlerini alyp barýar we belli bir ugurlarda hüjüme geçmäge taýýarlanýar" diýip, Ukrainanyň Ýaragly güýçleriniň baş ştabynyň 2-nji fewraldaky gündelik hasabatynda aýdylýar.
"Agyr ýitgi çekmegine garamazdan, ol Liman, Bahmut, Awdiýwka we Nowopawliwka töwereklerinde [Donetsk sebitinde] hüjüm hereketlerini dowam etdirýär" diýip, baş ştab aýtdy.
Ukrainanyň prezident edarasy Donetskde, Bakhmutyň içinde we töwereginde aýlap dowam edýän aldym-berdimli çöweşleriň çäginde 31-nji ýanwarda, rus toplarynyň azyndan bäş parahat ýaşaýjynyň ölmegine we 10 adamyň ýaralanmagyna sebäp bolandygyny aýtdy.
Rus güýçleri soňky 24 sagadyň dowamynda Ukrainanyň nyşanalaryna alty sany raketa atdy, olaryň dördüsi Donetskdäki Slowiýansk, Kramatorsk we Drujkiwka şäherleriniň raýat infrastrukturasyna gelip urdy, howadan dört zarba uruldy, tapgyrlaýyn raketa atýan ulgamlardan bolsa, 73 raketa atyldy diýip, harbylar aýtdy.
Prezident Wolodymyr Zelenski 1-nji fewralda öň hatardaky ýagdaýyň has kynlaşandygyny aýtdy.
"Basybalyjylaryň ýurdumyzyň gündogaryndaky frontda edýän hüjüm hereketlerinde belli bir derejedäki işjeňleşme bellige alyndy. Ýagdaý has-da çataklaşdy" diýip, Zelenski gije eden wideo ýüzlenmesinde aýtdy.
Zelenski ruslaryň 24-nji fewralda başlanan urşuň ilkinji ýyl dönüminde görkezip boljak derejede bir ýeňiş gazanmaga synanyşýandygyny aýtdy.
Ukrainanyň Howpsuzlyk geňeşiniň sekretary Oleksi Danilow hem Russiýanyň 24-nji fewralda başlan çozuşynyň birinji ýyl dönümine gabatlap köp ugurdan uly hüjüm edip biljekdigini duýdurdy.
"Russiýa maksimum derejedäki eskalasiýa [ýagny alyp barýan urşuny iň ýokary derejelerine çykarmaga] taýýarlanýar" diýip, Danilow 31-nji ýanwarda "Sky News" teleýaýlymyna beren interwiýusynda aýtdy.
"Olar mümkin bolan ähli zady toplaýar, türgenleşik üstüne türgenleşik geçirýär" diýip, ol sözüniň üstüni ýetirdi.
Danilow indiki ýa-da üç aýyň "urşuň kesgitleýji aýlary" boljakdygyny aýtdy.
Ukrainanyň goranmak ministri Oleksiý Reznikow ruslaryň goşun bölümleriniň ondan-oňa geçirilmegine salgylanyp, çozuşyň ýyl dönümini bellemek üçin, Moskwanyň "bir zatlar etmäge synanyşyp biljekdigini" aýtdy.
Reznikow Fransiýanyň BFM teleýaýlymy bilen eden söhbetdeşliginde rus goşunlarynyň serhetde toplanylýandygyny we, ukrain goşunynyň berýän bahasyna görä, olaryň esger sanynyň sentýabr aýynda harby gulluga çagyrylan 300 müň adamdan hem kändigini aýtdy.
Ukraina geçen hepde ABŞ-dan we Germaniýadan özüni goramak üçin soraýan tanklarynyň beriljekdigi barada wada alyp, günbatar ýaranlaryndan has kän döwrebap ýarag, şol sanda söweş uçarlaryny we uzak aralyga ýetýän artilleriýa ulgamlaryny erjellik bilen soramagyny dowam etdirdi.
Birleşen Ştatlar häzirlikçe F-16 söweş uçarlarynyň iberilmejekdigini aýtdy, ýöne beýleki hyzmatdaşlar bu mesele babatynda has açykdyklaryny mälim etdiler.
Kreml Günbataryň iberýän harby ýükleriniň konfliktiň has möwjemegine sebäp bolup biljekdigini duýdurdy.
Şeýle-de, Ysraýylyň premýer-ministri Benýamin Netanýahu Ukraina harby kömek bermekden gaýtmajakdygyny, şol sanda Kiýewe demir gümmez diýlip atlandyrylýan raketa garşy goranyş ulgamyny hem berip biljekdigini aýdanyndan soň, Russiýa Ysraýyla Ukraina ýarag bermezlik barada duýduryş berdi.
Netanýahu, eger-de iki tarap we ABŞ razy bolsa, özüniň Russiýa bilen Ukrainanyň arasyndaky gepleşiklerde araçy hökmünde çykyş etmäge hem taýýardygyny aýtdy.
Forum