Russiýa Kiýewe hem-de Ukrainanyň beýleki sebitlerine edýän yzygiderli dron we raketa hüjümlerini üçünji gün hem dowam etdirip, howa goragçylarynyň tasdan ähli nyşnanany urandygyna garamazdan, azyndan bir adamyň ölmegine, birnäçe adamyň ýaralanmagyna, maddy zaýaçylyga sebäp boldy diýip, sebit resmileri we harbylar 13-nji iýulda, irden habar berdiler.
Kiýewiň häkimi Witali Kliçko öten agşam Ukrainanyň paýtagtyna urlan zarbada bir adamyň ölendigini, dört adamyň ýaralanandygyny aýtdy.
Ölen adamyň jesedi Kiýewiň Podilski etrabynda, ýangyn söndürijiler tarapyndan tapyldy diýip, Kliçko telegramda aýtdy. Ol ýaralanan adamlaryň ikisiniň keselhana ýerleşdirilendigini, binalara hem zyýan ýetendigini sözüne goşdy.
Kiýewiň harby administrasiýasynyň başlygy Serhiý Popkonyň tassyklamagyna görä, öten agşam paýtagtyň üstünde Eýranda öndürilen pilotsyz uçarlaryň onlarçasy urlup ýykyldy.
Ukrainanyň Içeri işler ministrligi urlan pilotsyz uçarlaryň galyndylarynyň Kiýewiň dört etrabyna gaçandygyny aýtdy.
Ukrainanyň howa goragçylarynyň beren maglumatyna görä, öten agşam Kiýewi we Ukrainanyň beýleki künjeklerini nyşana alan 20 pilotsyz uçaryň ählisi urlup ýykyldy.
Şeýle-de, howa goragçylarynyň aýtmaklaryna görä, Ukrainanyň çägine Gara deňizden atylan ganatly raketalar, iki sany “Kalibr” raketasy we Russiýa tarapyndan anneksiýa edilen Krymdan atylan ganatly raketa, “Iskander” raketasy ýok edildi.
"Biz howa goranyşy boýunça üstünlikli operasiýa geçirdik" diýip, howa goragynyň metbugat sekretary Ýuriý Ihnat milli telewideniýä aýtdy.
"Ýigrimi Şahid ýok edildi – uçup gelýänleriň ählisi urlup ýykyldy” diýip, ol aýtdy.
Pilotsyz uçarlaryň we ganatly raketalaryň käbiri Mykolaýiw we Hmelnytski sebitlerini hem nyşana aldy diýip, ýerli häkimiýetler habar berdi.
Bu Russiýanyň Ukraina garşy tapgyr üçünji gije eden hüjümi bolup, Kiýew üçin möhüm iki günlük sammitiň, Litwanyň Wilniýus şäherinde, Russiýadan 260 km we Moskwanyň ýakyn ýarany Belarusdan 30 km uzaklykda gurnalan ýygnanyşygyň birnäçe sagat öňünden başlandy.
Ukrain goşunlary söweş meýdanynda, gündogar Donetsk sebitindäki Bahmutyň töwereginde 35 söweş hereketine gatnaşdy diýip, baş ştab 13-nji iýulda, irden aýtdy.
Gündogar sebitiň Goranmak güýçleriniň metbugat sekretary Serhiý Çerewati 12-nji iýulda ukrain güýçleriniň Bahmut sebitinde "aram tizlikde" öňe barýandyklaryny we bu inisiatiwanyň özlerinde galýandygyny aýtdy.
Azat Ýewropa/Azatlyk Radiosy söweş meýdanyndan berilýän habarlary garaşsyz ýagdaýda barlap, tassyklap bilmeýär.
Şu aralykda rus generaly, häzir Ukrainanyň Zaporižýa sebitindäki söweşlere gatnaşýan 58-nji kombinirlenen ýaraglar goşunynyň serkerdesi Iwan Popow 12-nji iýulda Russiýanyň baş serkerdesi Waleriý Gerasimowa frontdaky rus goşunlarynyň agyr ýagdaýy barada iberen hasabatyndan soň, haýal etmän wezipesinden boşadylandygyny aýtdy.
Popow rus kanun çykaryjysy Andreý Gurulew tarapyndan çap edilen ses habarynda söweş meýdanynda köpçülikleýin ölüme sebäp bolýan problemalary ýazyp görkezendigini aýtdy. Popow öz iberen hasabatynyň Russiýanyň Goranmak ministri Sergeý Şoýgu tarapyndan "bir günde" işinden boşadylmagyna sebäp bolandygyny aýtdy.
Russiýanyň Goranmak ministrligi 12-nji iýulda “Wagner” toparynyň geçen aýda gurnan gysga wagtlyk gozgalaňyndan soň, Ýewgeniý Prigožiniň hususy harby kompaniýasyna berlen 2000-den gowrak harby enjamyň yzyna alnandygyny aýtdy.
Bu topar döwletden alan ýaraglaryny, şol sanda tanklary, raketalary we 2500 tonnadan gowrak ok-därini, 20 000 töweregi kiçi ýaragy Russiýanyň adaty ýaragly güýçlerine tabşyrmagy tamamlaýar diýip, ministrligiň 12-nji iýulda beren habarynda aýdylýar.
Bu ýaraglar enjamlaryň saklanyp ýa-da bejerilip bilinjek ýerlerine, tyla geçiriler diýip, ministrlik aýtdy.